LAOAG CITY – Inbatad ti maysa a private lawyer a ni Atty. Irineo Kidd Castro a saan a rumbeng a dangran wenno ipadalan ti hazing ti maysa nga indibidual tapno makasursuro.
Reaksyon na daytoy mainaig iti panangdangran dagiti pulis kadagiti recruit da iti headquarters ti Regional Mobile Force Battalion 14-B, Police Regional Office BAR, idiay Lamitan City, Basilan.
Inpaganetget ni Castro a naiget nga ipawpawil ti linteg ti hazing isut gapuna a saan a rumbeng nga itolerate dagitoy a pasamak.
Nagballaag ni Castro a dagiti manglabsing ti anti-hazing act ket mabalin a sumango dagitoy ti kaso kriminal no sadinno a ti kadagsenan a maipataw a pannusa ket reclusion perpertua wenno tungpal biag a pannakaibalud, kasta pay ti physical injuries wenno slight physical injury.
Kabayatanna, pabor ni Atty. Castro iti nagbalin a desisyon ti National Police Commission a nangikkat kadagiti 70 a pulis ti Regional Mobile Force Battalion ti BARMM gapu ta saan a rebbeng nga itolerate dagiti saan a nainkalintegan nga aramid dagiti kameng ti nailian a pulisya.
