LAOAG CITY – Mangiparuk-at ti Bureau of Customs (BOC) ti warrant of seizure and detention kontra iti walo a luxury vehicles a konektado ken ni dati nga Ako-Bicol party-list Rep. Elizaldy “Zaldy” Co.
Inbatad ni Bureau of Customs Commissioner Ariel Nepomuceno nga adda ti iregularidad kadagiti dokumento dagiti lugan isut gapuna nga inrekomendarda nga adda ti maiparuk-at a warrant.
No saan a maipakita ti akinkukua ti lehitimo a papeles, dagiti lugan ket maipan iti babaen ti gobierno.
Idi Enero, nakumpiskar metten ti Bureau of Customs ken Philippine National Police ti 14 a lugan ni Co a naglabsing iti Customs Modernization and Tariff Act.
Ni Co ket karaman iti iskandalo ti flood control projects no sadinno a maipagarup nga immawat isuna ti kickbacks.
Addaan daytoy ti arrest warrant manipud iti Sandiganbayan mainaig iti P289.5 milyon nga anomalya iti proyekto idiay Naujan, Oriental Mindoro.
Iti agdama, ti walo a luxury cars ket naka-park iti Independent Commission for Infrastructure compound idiay Taguig City kalpasan ti search iti condominium ni Co.
