LAOAG CITY – Inparuk-aten ti kapulisan idiay Canada ti pakabigbigan ti suspek nga adda iti likudan ti pammaltog iti Tumbler Ridge school.
Inbatad ni Deputy Commissioner Dwayne McDonald a ti pakabuklan a bilang ti natay ket walo laeng maidasig iti immuna a naipadamag a daytoy ket siam.
Ti suspek ket ni Jesse Van Rootselaar, agtawen ti 18 a babai.
Kuna ti opisial a naipasngay a lalaki ti suspek ken nangrugi a nagbalin a babai idi agtawen daytoy ti innem.
Nabirukan a natay ti suspek iti maysa a kuarto ti pagadalan a mapapati a nagpakamatay.
Mainaig iti daytoy, dagiti biktima ket pakairamanan ti tallo a babai nga estudiante nga agtawen ti 12, dua a lalaki nga estudiante nga agtawen ti 12 ken 13.
Nakita a pimmusay met iti pagtaenganda ti ina ken step brother ti suspek.
Inpasigurado ni Canadian Prime Minister Mark Carney a tulunganda ti pamilia ti biktima ken paigetan ti panagaramat ti paltog gapu ta daytoy ti maibilang a kakaroan a pammaltog iti pakasaritaan idiay Canada.
Maipalagip a gapu iti krimen ket napaserraan ti Tumbler Ridge Secondary School ken Tumbler Ridge Elementary School iti uneg ti makalawas.
Immuna iti daytoy, sinuspenso ti Canadian Prime Minister ti panagbiahena idiay Germany tapno agatendar koma ti Munich Security Conference kalpasan ti napasamak a pammaltog iti British Columbia.
