LAOAG CITY – Inpetteng ti Philippine Navy nga awan pulos ti panagamak dagiti soldado a Pilipino a naiwaras iti West Philippine Sea iti baet ti bumarbara a word war iti nagbaetan ti Pilipinas ken China.
Segun ken ni Navy spokesperson Rear Admiral Roy Vincent Trinidad, nagtalinaed a buo ken nangato ti morale ti tropa ti gobierno gapu ta maawatan dagitoy ti mandato da ken ti pudno a sitwasyon iti kabaybayan.
Kuna pay ti opisyal a gapu ta literal nga adda iti frontline dagiti soldado, naun-uneg ti panangawat da iti isyu.
Kas pammaneknek, makakatawa laengen dagitoy iti sitwasyon ken saan da nga agpapaapektar iti isyu iti pulitika.
Inpetteng ni Trinidad a saan a pada a Pilipino ti kabusor no di ket dagiti gangannaet a makibibiang iti teritoryo ti pagilian.
Nagballaag ni Trinidad a ti siasinno man nga agiwarwaras ti saan nga usto a narrative ket nalawag a mangilunglungalong ti interes ti kalaban wenno ti Chinese Communist Party.
TI rakurak ti opisyal ket kalpasan ti panagbinnara iti sarita ti Chinese Embassy kenni Philippine Coastguard spokesperson Commodore Jay Tarriela, ken ti panangipasa ti sendo iti maysa a resolusyon a mangkonkondenar kadagiti pananginsulto ti Beijing kadagiti opisyal ti Pilipinas.
Kabayatanna, agtultuloy ti isaysayangkat a modernisasyon ti Navy ken panangipatpatungpal kadagiti patrol iti disputed waters.
