LAOAG CITY – Inpaganetget ni Senate President Pro Tempore Panfilo “Ping” Lacson a korapsion ti kadakkelan a pannubok para kadagiti agpaidasig iti 2028 elections.
Rakurak daytoy ni Lacson kagiddan kadagiti anunsio iti panangideklarar dagiti tumaray inton 2028.
Segun kenkuana, sakbay nga agngudo ti panagserbina iti gobierno inton Hunio 2031, mangnamnama daytoy a ti husto ti agtalinaed para iti pagilian kadagiti sumarsaruno a dekada.
Inbatadna a mamati daytoy a ti panagkunniber ti kadakkelan a makaabbeng iti pananggun-od ti panagdur-as iti ekonomia para kadagiti Pilipino.
Inlawlawagna a dagiti rakurakna ket kalpasan ti anunsio ni Vice President Sara Duterte idi Mierkoles, Pebrero 18 ti planona nga agpaidasig para iti Presidente inton 2028.
Mainaig iti daytoy, kuna ni Lacson a karebbengan ti tunggal Pilipino a kualipikado iti babaen ti Konstitusion a tumaray iti aniaman a posision.
Inpettengna nga adda ti kabukbukudan a rason ti Bise Presidente ken dagiti adviser daytoy iti nasapa a panangideklararna.
Nupay kasta, inpakaammo ni Lacson a nasayaat a gagem ken goodluck ti maipaayna ken ni Duterte ken iti asinoman nga agdesision a tumaray tapno idauluan ti Pilipinas.
Kabayatanna, inrakurak ti maibilang nga “United Opposition” a sakbay nga agngudo ti tawen ket mangiparuk-atda ti listaan dagiti kandidato nga agpaidasig iti grupoda para iti 2028 elections.
