LAOAG CITY – Ilunglungalong ni Senador Erwin Tulfo ti Senate Bill 1876 a gagem nga aramiden a krimen ti panangbaybay-a kadagiti proyekto ti gobierno a saanna a matungpal ti naikeddeng a pagannurotan ti kalidad.
Inpettengna a dagiti pampubliko nga imprastraktura ket mapunpundoan manipud iti buis dagiti umili isut gapuna a masapul laeng a masigurado ti kinatalged, tibker ken kalidad dagitoy.
Inlawlawagna a dagiti perdi a proyekto ti gobierno ket mangituntunda ti pannakasayang iti pundo ti gobierno, pannakairisgo iti biag, pannakaitantan iti pamastrek ken pannakapukaw ti talek ti publiko kadagiti institusion ti gobierno.
Iti babaen ti gakat, nalawag nga arisiten ti panagsungbat ken pannusa para kadagiti opisial ti gobierno, kontratista, inhinyero ken dadduma pay a karaman a mapaneknekan a nagkurang iti responsibilidadna.
Iti kanito a mapagbalin a linteg, dagiti mapaneknekan a naglabsing ket sumango iti pannakaibalud manipud iti innem a bulan agingga iti 12 a tawen wenno multa a saan a bumaba iti 10 a milyon a pisos.
