LAOAG CITY – Dimmalanen iti Personnel Selection Board ti sumagmamano a nagaplikar a doktor iti City Health Office ditoy siudad ti Laoag.
Segun ken ni Mayor James Bryan Alcid, addanto ti pannakisaritana iti Human Resources Office maipanggep iti daytoy a banag.
Inbatadna a masapul a mapaalisto ti amin a pannakaipatungpal dagiti programa ken aktibidad ti lokal a gobierno.
Kunana a no mabalbalin ket iti 1st quarter pay laeng ket maipatpatungpalen dagiti amin a programa tapno marikna met laeng dagiti umili.
Inlawlawagna a dagiti nagaplikar a doktor ket adda met ti umiso a kwalipikasionna ken mangnamnama a ti kabiitan a panawen ket makapagserbi dagitoyen iti publiko.
Innayonna a babaen iti daytoy ket ad-adu pay dagiti matulungan nga umili nga agturturong iti City Health Office.
Maipalagip nga immunan nga inpakaammo ni Dr. Rodrigo Catcatan, mangidadaulo ti City Health Office nga agkurang pay ti dua a doktor ti opisinada kalpasan a nagretiron dagiti dadduma.
