LAOAG CITY – Inrakurak ni Bombo International News Correspondent Jovelle Yute iti Tel Aviv, Israel nga apagapaman a nagparbeng ti mapaspasamak a tension iti ayan da a pagilian manipod iti iraraot ti Iran.
Inpakaammo na a sipud nangrugi ti gubat ket limitado laeng dagiti nakalukat nga establisimiento kas kadagiti parmasya ken klinika gapu ta ti kangrunaan a prayoridad ti gobierno ti Israel ket ti kinatalged ken seguridad dagiti umili.
Inbatad na a natalged da iti ayanna iti agdama ken no adda ti maawat da nga alarm ken makangngeg da ti siren ket agtaray a dagus a mapan iti bomb shelter idinto a mabati latta iti salas da ti ay-aywanan na a baket.
Kuna na a saan a kayat ti aywan na ti mapan iti bomb shelter gapu ta ti ipetpetteng na ket dakkel ti pammati na iti Diyos ken agtalek nga awan ti mapasamak kenkuana.
Nupay kasta, inadmitir na a naidumduma ti kapigsa dagiti missiles ti Iran no ikompara na kadagiti dadduma a grupo wenno pagilian a rimmaot iti Israel iti kallabes.
Mainaig iti daytoy, inpasigurado ni Yute a natalged iti ayan na a pagilian ken no adda man ti pammilin ti gobierno ti Pilipinas para iti panag-repatriate dagiti Pilipino iti Israel ket saanna a tungpalen daytoy.
Inpetteng na a saan nga agawid iti Pilipinas gapu ta amangan no saan a matay iti bomba ngem matay ti bisin ditoy pagilian.
