LAOAG CITY – Natay ti maysa nga ina kalpasan a binagkong ti maysa a lalaki a maipagarup a makapaspasar ti mentally challenged kabayatan a matmaturog iti uneg ti pagtaenganda iti Barangay Pagsanahan Norte iti ili ti Badoc.
Ti biktima ket agtawen ti 23, naasawaan ken residente ti Barangay Pagsanahan Norte iti ili ti Badoc idinto a ti suspek ket agtawen ti 33, awanan asawa, awanan trabaho ken residente iti nasao a barangay.
Segun ken ni P/Cpt. Elison Pasamonte, Hepe ti Badoc Municipal Police Station, agarup 02:50 ti malem, kabayatan a matmaturong ti biktima ken ti anakna iti uneg ti pagtaenganda ket simrek ti suspek iti kuartoda a kellaat a binagkongna ti biktima iti paset ti barukongna babaen ti kutsilyo nga insigida a naglibas iti saan a masinunuo a direksion.
Naitaray ti biktima iti Corpuz Clinic and Hospital idiay Sinait, Ilocos Sur para iti pannakatamingna ngem naideklarar a dead on arrival babaen ti attending physician.
Narekobre dagiti otoridad ti maysa a kutsilyo nga inusar ti suspek iti krimen.
Nangiwayat ti hot pursuit operation dagiti otoridad kontra iti suspek no sadinno a natiliw daytoy iti likud ti pagtaenganda.
Mainaig iti daytoy, inpakaammo ni P/Cpt. Pasamonte nga awan met ti dati a susik ti biktima ken suspek.
Nupay kasta, kunana a rumrummuar iti imbestigasionda a posible a ramesen ti suspek ti biktima.
Inlawlawagna a nabartek ti suspek idi aramidenna ti insidente.
Naammoan nga agmaymaysa ti suspek nga agnanaed iti pagtaenganda.
Innayonna a manamnama a maipila ti kaso a murder kontra iti suspek.
