LAOAG CITY – Iyuray ken adalen pay a naimbag ni Presidente Ferdinand R. Marcos Jr., ti pinal a bersion ti Anti-Political Dynasty Bill apaman a maisubmitiren iti Malacañang.
Inbatad ni Palace Press Officer Undersecretary Claire Castro nga iyur-uray pay ti Office of the President ti bersion ti gakat manipud iti Senado ken Kamara de Representantes sakbay a tingitingen daytoy ti Presidente.
Kunana a karaman kadagiti adalennna no ania ti agbalin a sakup ti panangipawil iti political dynasty no agingga iti second wenno fourth degree of consanguinity.
Iti agdama, inlawlawagna a ti napateg ket palpasen pay laeng nga umuna ti Kongreso ti gakat ken maipatulod daytoy iti opisina ti Presidente.
Adda ti bukud a bersion ti Senado ken Kamara de Representantes pakairamanan ti House Bill No. 6671 nga inaprobaran ti House Committee on Suffrage and Electoral Reforms.
Iti kanito a maawat ti Malacañang ti gakat, ditoy nga agdesision ti Presidente no pirmaanna nga agbalin a naan-anayen a linteg.
