LAOAG CITY – Ginutigot ni Senador Bam Aquino ti gobierno nga i-activate nga insigida ti fuel subsidies para iti transport sectors iti baet ti panagngato ti global oil prices gubuay iti pangta ti posible a kumaro pay ti tension idiay Middle East.
Inpetteng ni Aquino a saan a linged a dagiti jeepney drivers, tricycle drivers ken Public Utility Vehicle drivers ti kangrunaan nga apektado ti panagngato ti presio ti gasolina ken diesel.
Inbatadna a ti fuel subsidy ket mangipaay ti proteksion iti biruk dagiti minilyon a drivers manipud iti panagngato ti presio dagiti produkto a petrolyo.
Kunana a daytoy ti rason no apay nga agpanpanawagan isuna a maipaayan ti tulong dagiti transport drivers ken transport workers gapu ta naaramid daytoy idi kangitingitan ti pandemia.
Kabayatanna, pinapigsa pay ni Aquino dagiti addang kontra iti korapsion tapno manayonan ti pundo ti gobierno para iti serbisio ken tapno masupusopan ti posible a kinaawan ti biruk no isuspenso ti excise tax iti produkto a petrolyo.
