LAOAG CITY – Inpakaammo ni Mrs. Janet Retamal, mangidadaulo ti Population on Commission nga awan pay ti naputar nga ordinansa a nayon a pannakaipaay ti financial assistance kadagiti teenage mother ditoy siudad ti Laoag.
Nupay kasta, inbatadna nga uray awan pay ti naputar nga ordinansa ket adda met dagiti dadduma nga ahensia a mangipapaay ti tulong para kadagitoy.
Inlawlawagna a kitkitaenda no ania ti kabaelanda a maitulong kadakauada gapu ta kalikagumda nga adda met laeng ti napintas a pagturongan iti biagda.
Kunana a kabinnuligda dagiti nagannak dagiti teenage mother tapno maallukoy dagitoy nga agbasa met laeng para iti napinpintas a masakbayanda.
Maipalagip a gagem ti nasao nga opisina a maipangato ti financial assistance a maipaay kadagiti ubbing nga inna ditoy siudad ti Laoag.
Kabayatanna, naammoan nga agaw-awat dagitoy ti 500 a pisos iti kada bulan a nayon a tulong pinansial para kadakuada.
