LAOAG CITY – Simmangpeten idiay New York ni Presidente Ferdinand Marcos Jr. kaduana ni First Lady Liza Araneta-Marcos para iti working visit idiay Estados Unidos.
Nag-landing ti nagluganan nga eroplano ti Presidente iti Newark Liberty International Airport idiay New Jersey agarup 2:56 ti malem, oras idiay Amerika.
Karaman iti delegasion da Foreign Affairs Secretary Maria Theresa Lazaro, Migrant Workers Secretary Hans Leo Cacdac, Presidential Communications Office (PCO) Secretary Dave Gomez, Department of Information and Communications Technology (DICT) Secretary Henry Aguda ken Presidential Adviser on Peace, Reconciliation and Unity Secretary Carlito Galvez Jr.
Adda idiay New York ti Presidente para kadagiti aktibidad ti United Nations (UN) mainaig iti kampania ti Pilipinas nga agbalin a non-permanent member ti United Nations Security Council para iti 2027 agingga iti 2028.
Napateg daytoy a banag gapu ta mangipapaay daytoy ti timek ken butos ti Pilipinas kadagiti napapateg a desision ti United Nations mainaig iti kinakappia, seguridad ken dagiti krisis kadagiti nagduduma a paset ti lubong.
Iti maikadua nga aldaw ti working visit-na, agturong ni Presidente Marcos iti United Nations Headquarters nga agatendar isuna iti Commission on the Status of Women ken mangipaay ti ababa a panagsarita para iti Pilipinas.
Adda pay dagiti naikeddeng a taripnong ti Presidente kadagiti sumagmamano a negosiante ken business leaders tapno papigsaen ti pang-ekonomia ken gutigoten ti panagpuunan ditoy pagilian.
Iti sumaruno nga aldaw, agsubli daytoy iti United Nations tapno agbitla iti maysa nga special plenary meeting kas paset ti agtultuloy a kampania ti Pilipinas para iti puesto iti United Nations Security Council.
