LAOAG CITY – Nakababan dagiti hikers a napan immuli iti Mt. Sicapo a maibilang kas highest peak ditoy probinsya a masarakan iti nagbaetan ti Ilocos Norte ken Abra, nga addaan ti kangato a 7,746 feet above sea level.
Immunan a naireport ti maipagarop a pannakapukpukaw dagiti hikers nga immuli iti Mt. Sicapo.
Basar iti report ti Office of Civil Defence Region I iti 1st District Congressional Office, dagiti dua nga immuli iti Mt. Sicapo ket residente iti Quezon City ken Cainta Rizal idinto a dagiti dua ket residente iti ili ti Nueva Era a nangi-guide kadakuada.
Segun met ken ni Governor Cecilia Araneta-Marcos, adda dagiti napan nangsabat a dagus kadagiti hikers kas ti Bureau of Fire Protection, Philippine National Police, Philippine Marine, Provincial Disaster Risk Reduction and Management Council, Medical Team ken dadduma pay tapno siguradwen a dagitoy ket saan a nadangran.
Naamoan a dagiti hikers ket immuli da iti Mt. Sicapo idi Marso 2 ken manamnama koma a makababa da iti Marso 8 no sadinno a kumamang da iti Karingking River Resort iti ili ti Solsona, ngem saan a napasamak daytoy isut gapuna a nagbalaw dagiti kakadwa da iti baba agingga a nagdesisyon da nga ireport daytoyen kadagiti maseknan nga otoridad ken ahensya.
Kabayatanna, inpakaammo ni Police Capt. Randy Damo, ti chief of police iti ili ti Solsona, nga apaman a nakaawat da ti mensahe a nasurutanen dagiti hikers ti karayan nga agturong iti Karingking River Resort ket insigida da met a napan nangsabat kadagitoy.
Iti impormasyon, adda ti liniklikan dagiti maseknan a landslide a rason metten ti pannakaiyaw-awan da isut gapuna a naibayag da iti kabanbantayan.
