LAOAG CITY – Inlungalong manen ni Senate President Pro Tempore Panfilo “Ping” Lacson ti nabayagen nga inpasana a gakat a gagem a papigsaen ken aramiden a baro ti linteg kontra iti espionage iti babaen ti nadagdagsen a pannusa ken panangsakup kadagiti baro ti panagespia usar ti moderno a teknolohia.
Inbatad ni Lacson, nabayagen nga inlungalongna ti gakat ngem nagtalinaed latta a nakapenpen iti komite ti Senado.
Kunana a gagem daytoy nga i-update ti anti-espionage law a nakalaglag-an ti pannusana.
Iti babaen ti gakat, mabalin a mapatawan ti life imprisonment wenno tungpal-biag a pannakaibalud nga awan ti parole ken multa a P5 milyon agingga iti P20 milyon ti asinoman a mapaneknekan a karaman iti espionage wenno pannakikunsabo iti pannakibiang ti maipapan ti pagilian.
Nagpanawagan ni Lacson ti naig-iget a pannusa kontra iti espionage kagiddan dagiti report a maipagarup nga aktibidad ti gangannaet a panagespia a targetda dagiti sensitibo nga impormasion ti estado ti Pilipinas.
Maipalagip a kinumpirmaran ti National Security Council a tallo a Pilipino ti naarestar iti kallabes mainaig iti maipagarup nga espionage a mapapati nga adda ti koneksion iti gangannaet nga intelligence nga aktibo iti pagilian ken kuna ni Navy Rear Admiral Roy Vincent Trinidad nga inadmitir dagiti suspek ken manarimaanen ti pannakitinnulongda kadagiti otoridad.
