LAOAG CITY – Binisita manen ni Mayor James Bryan Alcid dagiti atleta ditoy ciudad ti Laoag kabayatan ti agtultuloy a panagsanay da para iti Region 1 Athletic Association Meet a maangay idiay Candon City, Ilocos Sur.
Nakita ti mayor no kasano ti kinaseryoso dagiti atleta iti panagsanay da ken inpasigurado na ti 100 a porsiento a suportana kadagitoy gapu ta kalikagom na nga agkampeon manen ti Team Laoag.
Inbalakad ni Mayor Alcid iti Team Laoag nga aramiden da amin a kabaelan da tapno agballigi da manen, aglalo ti ciudad ti Laoag ket maibilang kas home of the champions iti benneg ti sports ken dadduma pay a talento.
Immunan nga inpakaammo ni Mr. Hipolito Salva, ti mangidadaulo iti City Sports and Development Office ditoy ciudad ti Laoag nga umabot iti 700 dagiti atleta ditoy ciudad ti makilaban iti Region 1 Athletic Association Meet ita a tawen.
