LAOAG CITY – Inrakurak ni House Committee on Good Government and Public Accountability Chairman ken Manila Rep. Joel Chua a dagiti naudi a rakurak ni Vice President Sara Duterte ket mangipaspasimudaag ti panagbuteng kabayatan nga agtultuloy ti proseso ti impeachment kontra kenkuana iti Kamara de Representantes.
Inbatad ni Chua, ti panangipila kadagiti reklamo iti impeachment ket rugi pay laeng ti konstitusional a proseso no sadinno a tingitingen ti Kamara de Representantes no adda ti umdas a pagibasaran tapno ipasa ti Articles of Impeachment iti Senado para iti panangtingiting.
Kunana a saan pay a nagisubmitir ti pormal a sungbat ti Bise Presidente kadagiti nabatbati a reklamo a nakapenpen.
Adda ti karebbengan ni Duterte nga agisubmitir wenno saan nga agisubmitir ti pleading a mabalin a paset ti legal nga istratehia tapno ipeksa ti kangrunaan a depensa iti Senado.
Nupay kasta, kuna ni Chua a dagiti rakurak iti kallabes ni Duterte ket arig mangibutaktak ti paset iti depensa ken mabalin a makatulong pay iti kaso ti Kamara de Representantes no maituloy ti proseso.
Ipettengna a ti timek ti rakurak ti Bise Presidente ket arig nakasentro iti panangimpluwensia ti opinyon ti publiko.
Innayonna a ti impeachment ket sumursurot kadagiti pagannurotan ti Konstitusion ken dagiti pagalagadan ti Kamara de Representantes ken nasken a saan a dadaelen sakbay a malpas ti proseso.
