LAOAG CITY – Manamnama a makarikna ti nam-ay ti publiko iti panagngato ti presio ti langis iti babaen ti posible a panangsuspenso ti excise tax nga umabot iti P6 agingga iti P10 ti kada litro iti uneg ti sumaruno a dua a lawas.
Daytoy ti inrakurak ni House Committee on Public Accounts Chairman ken Bicol Saro Partylist Rep. Terry Ridon.
Inbatad ni Ridon nga agarup nalpasen iti House of Representatives ti linteg a mangipaay ti bileg ken ni Presidente Ferdinand Marcos Jr. nga isuspenso ti excise tax iti produkto a petrolyo ken manamnama a maipasa daytoy iti Senado inton sumaruno a lawas.
Mainaig iti daytoy, apaman nga agbalin a linteg, mabalin a bumaba ti agingga iti P10 ti kada litro ti presio ti gasolina ken diesel no masuspenso ti excise tax a dakkel a tulong kadagiti umili.
Kuna ni Ridon, agbalin nga “historic” ti addang gapu ta insigida a maipatungpal ti panangsuspenso no ideklarar ti Presidente ti state of national emergency mainaig iti presio ti petrolyo a saanen a kasapulan nga aguray ti tallo a bulan nga average ti presio ti krudo.
Innayonna a manamnama a mabalin nga umabot iti P100 ti kada litro ti presio ti langis kadagiti sumaruno a lawas isu a dakkel a nam-ay ti posible a panagbaba ti presio para iti transport sector ken iti sibubukel nga ekonomia.
