LAOAG CITY – Saan nga umdas ti P5,000 a fuel subsidy nga ipaay ti gobierno para kadagiti driver nga apektado ti kinangina ti presio dagiti produkto a petrolyo nga epekto ti agtultuloy a gubat idiay Middle East.
Segun iti maysa a TNVS driver, ti maipaay a fuel subsidy ket para laeng iti big time oil price hike iti napalabas a lawas no sadinno a saan pay a karaman ditoy ti dakkel a panagngato iti presio dagiti produkto a petrolyo ita a lawas.
Inbatadna a nangaton ti presio ti petrolyo ket nangato pay ti ipataw iti komisionda dagiti TNVS company.
Gapu iti daytoy, nagpanawagan iti gobierno a nayonan ti ipaay a fuel subsidy.
Kuna met ti maysa a jeepney driver, nasken a pagbalinen a mamitlo a daras ti gobierno ti nasao nga ayuda.
Inpettengna a gapu iti agtultuloy a gubat idiay Middle East ket manamnama ti nangato a nayon iti presio dagiti produkto a petrolyo kadagiti sumaruno a lawas.
Innayonna nga agpaut pay daytoy agingga a saan nga agsardeng ti riribok idiay Middle East.
