LAOAG CITY – Nagpinnirma iti maysa a katulagan ti Ilocos Norte Electric Cooperative ken ti ACEN Corporation para iti pannakaipatungpal ti proyekto a solar rooftop ditoy probinsya.
Iti babaen daytoy a proyekto nga inisyatibo ti gobierno probinsyal ken nakisosyo iti ACEN Corporation, GCash, Solaric, at Ilocos Norte Electric Cooperative, makainstolar dagiti pagtaengan kadagiti solar rooftop system no sadinno nga instalment a bayadan da ti magastos manipod tallo agingga iti 15 a tawen.
Naamoan a dagiti interesado nga aplikante ket mabalin da laeng ti makikoordinar kadagiti local a gobierno ditoy ciudad ti Laoag, Dingras ken Pagudpud.
Ti kasosyo a Solaric ket mangiyuswat kadagiti inspeksyon iti bubongan idinto a ti GCash ti mangikeddeng iti kwalipikasyon iti panagpautang.
No maaprubaran ti aplikasyon ket ikabil ti Solaric ti sistema, ken kalpasan na ket ikonektar iti grid iti babaen ti net metering kadwa da ti kooperatiba.
Ti net metering keet mangipaay ti gundaway kadagiti pagtaengan a mangipatulod ti sobra a kuryente agsubli iti grid, a makaala kadagiti kredito a makakissay kadagiti singir da iti kuryente.
Mainaig iti daytoy, bigbigen ni INEC General Manager Cipriano Martinez III a ti inisyatibo ket mabalin a makakissay iti mailako iti enerhiya ti kumpanya ngem bigbigen na met ti napintas a gagem na a gutiguten ti responsible a panagusar ti enerhiya iti kapital ti renewable energy.
Ti ACEN, ti plataporma ti enerhiya ti Ayala Group, ket suportaran na ti pannakaipatungpal ti programa, usaren na ti kapadasan na iti nalawa a pannakapadur-as ti renewable energy, karaman ti 365 megawatts ti wind power iti 99 a turbine iti probinsya.
