LAOAG CITY – Manarimaan ti panangurnus ti lokal a gobierno ditoy ciudad ti Laoag ti fuel subsidy a maipaay iti nagduduma a sektor ditoy ciudad tapno maalay-ayan ti panagngato ti presyo dagiti produkto a petrolyo.
Daytoy ti inbatad ni Mayor James Bryan Alcid ditoy ciudad ti Laoag.
Karaman kadagiti maipaayan ti fuel subsidy ket dagiti jeepney drivers, tricycle drivers, mannalon ken mangngalap ditoy ciudad ti Laoag.
Inlawlawag na a saan a cash ti ited da no di ket vouchers tapno masiguado a maikabil ti gas dagitoy a subsidiya.
Kuna ti mayor nga iti agdama ket manarimaan paylaeng ti pannakikoordinar da kadagiti gas station ti north ken south of the river a pagpagasolinaan dagiti benepisyaryo.
Inpanamnama na nga aramiden amin ti gobierno lokal ti kabaelan da para iti alisto a pannakaibunong ti fuel subsidy kadagiti nasao a benepisyaryo.
Kabayatanna, inlawlawag ti mayor a dagiti tricycle driver nga aggapo iti sabali nga ili nga agpaspasada ditoy ciudad ti Laoag ket saanda a karaman a maikkan ti fuel subsidy.
