LAOAG CITY – Binabalaw ni Senador Rodante Marcoleta iti maipagarup a panangbaybay-a ti Department of Energy iti panagmonitor ti ngumatngato a presio dagiti produkto a petrolyo.
Iti panagdengngeg ti Proactive Response and Oversight for Timely and Effective Crisis Strategy (PROTECT) Committee ti Senado, kwinestionaran ni Marcoleta, Chairman ti Senate Committee on Trade, Commerce and Entrepreneurship, ti kellaat a panagngato iti presio uray adda met pay ti existing inventories ti langis.
Inlawlawag ni Department of Energy Oil Management Bureau Director Rino Abad a kasapulan a makolektar ti oil companies ti gatad kadayta a lawas tapno makagatang ti seven-day replacement.
Iti baet daytoy, inpetteng ni Marcoleta a nasken nga inusar ti Department of Energy ti bileg daytoy a kiddawen kadagiti oil company a mangipresentar kadagiti dokumento a mangilawlawag ti kellaat a panagngato iti presio dagiti produkto a petrolyo dagitoy.
