LAOAG CITY – Naikeddeng a mangipasa ti petision ti sumagmamano nga abugado tapno ipa-impeach ni Commission on Elections (COMELEC) Chairman George Erwin Garcia.
Segun iti petitioner a ni Atty. Marvin Aceron, daytoy ket gapu iti maipagarup a panaglabsing ni Garcia iti Automated Election System Law, betrayal of public trust ken dadduma pay a maipagarup a krimen a namunganay iti napalabas a dua a national elections.
Uppat nga articles ti indatag da Aceron pakairamanan ti panagusar ti dadduma pay a source code, saan nga otorisado a server ken panangilimed iti panagusar ti single private IP address para iti 20,000 vote counting machines kadagiti naglabas nga eleksion.
Maysa pay kadagiti nagibasaran ti inawaganda a betrayal of public trust gapu iti sistematiko ken agpilpili a panangipatungpal ti campaign finance laws iti kaso da Sen. Chiz Escudero ken Sen. Rodante Marcoleta mainaig iti panangawatda ti donasion idi timmaray idi 2022 ken 2025.
Kabayatanna, inawagan ni Garcia a daan nga isyu dagiti alegasion ken paulit-ulitnan a sinungbatan daytoy.
