LAOAG CITY – Bimmaba ti 50 a porsiento ti turista ditoy probinsia.
Daytoy ket basar iti report ti Ilocos Norte Tourism Office iti opisina ni Gov. Cecilia Araneta Marcos.
Segun ken ni Gov. Marcos, no idasig kadagiti napalabas a tawen ket dakkel nga amang ti bimmabaanna ngem no idasig idi COVID-19 pandemic ket ad-adu ita.
Nupay kasta, kitkitaenda dagiti mabalin a wagas a manggutigot kadagiti turista nga agturong latta ditoy probinsia iti baet ti krisis.
Naammoan a maysa kadagiti addangda ket ti pannakaipaay ti Libreng Sakay a nairugi daytoy idi Semana Santa a kinabinnulig ti maysa a bus company ti Provincial Government of Ilocos Norte tapno maipaay daytoy a tulong.
Kabayatanna, adda ti 500 nga indibidual a residente ken turista ti nanggundaway iti daytoy no sadinno nga adda ti 12 a biahe ken 43 ti kada biahe.
