LAOAG CITY – Inpasigurado ni Agriculture Secretary Francisco Tiu Laurel Jr. nga agtalinaed a natalged ti suplay ti bagas iti pagilian iti laksid ti panagngato ti presio ti langis ken gastos iti agrikultura gapu iti tension idiay Middle East.
Segun iti mangidadaulo ti Department of Agriculture, ti posible a 20% a panagbaba ti produksion ti bagas ket maibilang laeng a “worst-case scenario,” ken saan a manamnama a mapasamak gapu kadagiti addang nga ipatpatungpal ti gobierno.
Innayon na a mairanranud ti Pilipinas iti nawadwad a global rice supply, aglalo kadagiti kangrunaan nga exporters kas iti India ken Vietnam nga iti agdama ket peak harvest season.
Segun iti sekretario, napunno pay laeng dagiti pagipempenan ti National Food Authority (NFA) nga agserserbi a buffer stock ti pagilian.
Nangilatang met ti Department of Agriculture ti P10 billion assistance package para kadagiti mannalon ken mangngalap, karaman ti fuel subsidies, ken nagduduma pay a targeted interventions nga addaan ti pakainaigan ti produksion ti bagas.
Nakasagana met ti gobierno nga agnayon ti agingnga P20 billion para kadagiti farm inputs ken P10 billion a tulong para kadagiti mangngalap tapno agtalinaed dagiti pamastrekan da.
Itandudo pay ti Department of Agriculture ti panagusar kadagiti alternatibo a solusion kas iti biofertilizers tapno makissayan ti panagdependar kadagiti nangina nga agricultural inputs.
