LAOAG CITY – Ngimmato ti sumurok 5% ti presio ti langis iti world market kagiddan ti posible a maperdi ti ceasefire iti nagbaetan ti Estados Unidos ken Iran.
Umaboten iti $95.46 iti kada bariles ti Brent crude idinto ti United States West Texas Intermediate (WTI) ket immabot iti $88.89 iti kada bariles.
Basar iti report, ngimmato ti presio kalpasan a kinumpiskar ti Amerika ti maysa nga Iranian cargo ship ken panangiserra manen ti Strait of Hormuz a maysa kadagiti pagdaldalyasatan ti sumurok-kumurang 20% ti world supply ti langis.
Iti baet a bimmagsak ti presio ti langis ti agarup 9% idi Biernes gapu iti temporario a panaglukat ti nasao nga Srait, naminsan manen a ngimmato ti presio daytoy gapu iti baro a tension iti dua a pagilian.
Nagballaag dagiti analyst a mabalin nga agtultuloy ti volatility wenno pabaliw-baliw a garaw ti presio ti langis kabayatan nga agtaltalinaed nga awan ti kasiguradoan ti katulagan iti nagbaetan ti Amerika ken Iran.
Posible a ngumato pay ti presio ti langis no saan a maiyurnos ti situasion iti Strait of Hormuz.
