LAOAG CITY – Mamati ti international law expert a ni Atty. Rodel Taton a mabalin nga agkiddaw ni dati a Congressman Zaldy Co ti asylum tapno ma-delay wenno maibaybayag ti pannakaideportar na ditoy Pilipinas.
Segun ken ni Taton, mabalin nga usaren ni Co ti posibilidad a maipaayan ti asylum iti nasao a pagilian kas ti inaramid ni dati a Presidential Spokesperson Atty. Harry Roque idi nagturong idiay Europe.
Kuna na a mabalin nga irason ni Co a daytoy ket kamkamaten dagiti otoridad ti Pilipinas ken sumangsango iti political persecution ditoy pagilian tapno maipaayan laeng ti asylum iti Czech Republic a nakaarestaran na iti kallabes.
Innayon na a mabalin nga usaren pay ni Co dagiti immunan nga inparuk-at na a video iti napalabas a tawen maipanggep iti maipagarop a serye ti korapsyon a mapaspasamak iti pagilian a maikonkonektar ti agdama nga administrasyon.
Nupay kasta, mabalin met a kontraen ti gobierno ti Pilipinas iti babaen ti pannakisarita na iti Czech Republic.
Inpalgak ni Taton a mabalin nga ipetteng ti Pilipinas a kamkamaten ti gobierno no Co gapu iti pannakairamanan na iti nalawa nga iskandalo a nakaipilaan na ti kaso a graft ken malversation iti local courts ti pagilian.
Kabayatanna, mamati ni Atty. Taton a ti kaalistoan a wagas tapno maisubli iti Pilipinas ni Co ket ti diplomatic negotiation iti nagbaetan ti gobierno ti Pilipinas ken Czech Republic.
