LAOAG CITY – Naaddaan ti apagbiit a panagsinnungbat da House Justice Committee chair Gerville Luistro ken Ako Bicol party-list Rep. Alfredo Garbin Jr. mainaig iti Statement of Assets, Liabilities and Net Worth (SALN) ni Vice President Sara Duterte iti pannakaituloy ti impeachment ita nga aldaw ti Miyerkules, Abril 22.
Inkalintegan ni Garbin, a maysa metlaeng nga abogado, a ti Statement of Assets, Liabilities and Net Worth a mangtumtumbuk nga adda ti “material misdeclaration” wenno “untruthful declaration,” ket saan a naka-attach iti impeachment complaints.
Insungbat met ni Luistro a saan pay a daytoy ti matrat-tratar iti komite, ngem inpetteng ni Garbin a ti panagbotos ti sufficiency in substance dagiti reklamo, nairaman ti annexes wenno kakuykuyog a dokumento.
Inlawlawag met ni Luistro a ti panangisyu ti subpoena ket saan a tapno nayunan, suportaran wenno ikorehir no ania ti nakailanad iti impeachment complaint, no di ket tapno tingitingen no ti reklamo ket umdas para iti existence ti probable cause tapno maiwanwan ti panel members iti panagdesisyon.
Iti met biang ni Manila 3rd District Representative Joel Chua, miyembro ti Justice panel, inlawlawag na a basar iti Section 7 ti Rules of Procedure iti Impeachment Proceedings, adda ti bileg ti komite a mangisyu ti “compulsory processes” para iti panagatendar dagiti testigo, ken produksiyon dagiti dokumento ken dadduma pay a related evidence, no sadinno a nakastrek iti panangpa-subpoena iti Statement of Assets, Liabilities and Net Worth iti babaen ti bileg ti komite.
