LAOAG CITY – Kwinestyunaran ni dati a Presidential Spokesperson Atty. Harry Roque ti panangkanselar ti korte ti pasaporte na ken panangideklarar na kas‘pugante’.
Iti maysa nga online post, inburay na ti inpila na a petisyon iti Court of Appeals tapno kariten ti nasao a desisyon ti Pasig City Regional Trial Court.
Gagem iti petisyon a kiddawen iti Court of Appeals a mangisyu daytoy ti Temporary Restraining Order tapno malapdan ti implementasyon iti nagbalin a ‘rulings’ ti korte.
Mamati ti kampo ni Atty. Roque linabsing ti korte ti karbengan na ken maipagarop nga awan ti legal a pagibasaran ti pannakakanselar ti pasaporte na ken ti panangawag kenkuana kas pugante.
Iti petisyon, inpetteng ti dati a presidential spokesperson a ti Pasig RTC ket naaddaan ti grave abuse of discretion kadagiti inisyu na a resolusyon idi Nobyembre 2025 ken Pebrero 2026.
Daytoy ket gapu iti maipagarop a saan na a panangbigbig iti karbengan na a maikkan ti due process, presumption of innocence ken freedom to travel.
Innayon ni Atty. Roque a napaay pay ti korte a bigbigen ti agtultuloy a panagkiddaw na a maipaayan ti ‘asylum’ iti Europe a masapol a suruten ti Pilipinas iti babaen ti International Law.
Maipalagip a ti nasao nga abogado ket sumangsango iti kaso a qualified human trafficking nga adda ti pakainaigan iti operasyon ti ilegal a POGO hub idiay Porac, Pampanga.
