LAOAG CITY – Maikonkonsiderar latta a mastermind iti maanomalya a flood control projects ni dati nga House Speaker Martin Romualdez.
Daytoy ti inpetteng ni Sen. Rodante Marcoleta kalpasan ti immuna a rakurak ni Romualdez a saan nga isuna ti utek iti maanomalya ken ti intudona ket isuda Sen. Chiz Escudero ken dati a Cong. Zaldy Co.
Iti privilege speech, inbatad ni Marcoleta a maikonkonsiderar latta a mastermind ti flood control projects scandal ni Romualdez gapu ta iti babaen ti panangidaulona ket napaspasamak ti sistema a nagtaudan dagiti anomalya.
Dinakamat ni Marcoleta nga awan met ti aggaraw iti Kamara de Representantes no awan ti pammilin manipud iti lider idi daytoy a ni Romualdez.
Kunana a ti House Speaker ket saan laeng a ceremonial figure ken saan a passive participant nga umawat lattan a basta-basta no diket daytoy ket sentro ti bileg a mangkonkontrol ti legislative agenda, makaimpluwensia iti aramid ti komite ken isu ti agdeterminar no ania ti talantanen iti plenario ti Kamara de Representantes.
