LAOAG CITY – Kiniddaw ni Mayor James Bryan Alcid ti panagan-anus dagiti residente kabayatan a maiyur-uray ti pannakapasilaw ti nagduduma a kalsada ditoy siudad ti Laoag.
Inlawlawag ti Mayor a dagiti kalsada ditoy siudad ket saan amin ket sakupen ti city government no sadinno nga adda dagiti kalsada a kukua ti national, provincial ken local government.
Inbatadna a ti prioridadda ket mapasilawan dagiti sakupen ti lokal a gobierno ken daytoy ti pinundoanda.
Kunana a para iti umuna a bansada ket addanto ti silaw a mainstolaren iti sangoanan ti dakkel a mall ditoy siudad ti Laoag.
Kabayatanna, inpakaammo ni Mayor Alcid nga iti airport road ket maibilang kas national road isu a sakupen daytoy ti Department of Public Works and Highways.
Mainaig iti daytoy, kunana a nakisaritan iti nasao nga ahensia ket inpanamnamada a mapasilawandanto daytoy iti kabiitan a panawen.
Innayonna a saanna a kayat a madoble ti pundo a mailatang kadagitoy isu nga iyur-urayda ti pannakaiyimplementar dagitoy a proyekto.
