LAOAG CITY – Natalged a naibakwit dagiti pasahero ken crew ti maysa a cruise ship a nakaptan ti hantavirus outbreak.
Segun kadagiti opisial, awan ti agpakpakita a sintomas kadagiti pasahero a naibakwit iti barko.
Naikabil dagitoy iti Tenerife airport babaen kadagiti military bus sakbay nga inlugan iti eroplano ti maseknan dagitoy a pagilian.
Naiget nga ipatpatungpal ti no-contact policy kadagiti pasahero tapno maliklikan ti posible a panagwaras ti virus.
Inrekomendar ti World Health Organization (WHO) ti 42 nga aldaw a quarantine para kadagiti amin a naglugan ti barko kas panagan-annad.
Karaman kadagiti pagilian a nangipatulod ti eroplano para kadagiti kailianda ket ti Spain, France, United Kingdom, Canada, United States, Netherlands, Turkey, Ireland, Australia ken dadduma pay.
Basar iti World Health Organization, sumagmamano a dati a pasahero a timmalawen iti barko ti nagsakit ken tallo dagiti natay.
Mapagat-atapan a mabalin a naala ti impeksion sakbay pay a naglugan iti cruise ship ken nagwaras daytoy kabayatan nga adda iti biahe.
Kabayatanna, inpasigurado ti health authorities a nababa ti risgo ti virus iti publiko ken agtultuloy ti naig-iget a panangtingiting ken monitoring kadagiti naapektaran.
Naammoan a kalpasan ti evacuation, madalusan ti barko ken ma-disinfect idiay Netherlands idinto a ti sumagmamano a crew members laeng ti agtalinaed para iti daytoy nga operasion.
