LAOAG CITY – Kinumpirmaran ti Department of Migrant Workers (DMW) a dumalan iti quarantine idiay Rotterdam, Netherlands ti 38 a Pilipino a seafarers a nakalugan ti cruise ship nga MV Hondius a nakaptan ti hantavirus sakbay a naan-anay a makaawid ditoy Pilipinas.
Inbatad ni Department of Migrant Workers Secretary Hans Leo Cacdac nga uppat a tripulante ti nagturong idiay Netherlands idi kalman, Mayo 10, idinto a 20 pay ti sumaruno.
Ti nabatbati a 14 a deck ken engine crew ket sumurot iti barko nga agturong iti Rotterdam.
Kuna met ni Health Secretary Ted Herbosa nga 42 nga aldaw ti quarantine protocol ken dumalan pay laeng nga umuna iti testing dagiti Pilipino a crew sakbay a mapalubosan a makaawid.
Iti agdama, segun iti sekretario, adda iti nasayaat a kasasaad dagiti Pilipino a crew a nagnegatibo iti virus.
Inpasigurado ti Department of Migrant Workers nga agtalinaed nga aktibo ti kontrata dagiti seafarer ken agtultuloy a makaawatda ti sueldo kabayatan a naka-quarantine idinto nga ibaklay ti akinkukua ti barko ti amin a magastos idiay Netherlands.
Maipalagip a tallo ti natay iti outbreak ti hantavirus iti barko pakairamanan ti agasawa a Dutch ken maysa a German national.
Inpakaammo dagiti health officials, nababa met ti risgo daytoy iti salun-at ti sangalubongan ken saan daytoy a maidasig iti COVID-19 pandemic.
Basar iti epidemiology bureau ti Department of Health (DOH), kinumpirmaran ni Herbosa nga awan ti nairekord a kaso ti hantavirus ditoy Pilipinas.
Inalay-ayan ti sekretario ti panagamak a maaddaan ti baro a COVID-19 pandemic iti baet ti naipadamag a kaso ti hantavirus.
