LAOAG CITY – Addan ti sungbat ti Malacañang iti panawagan ni Sen. Ronald “Bato” Dela Rosa ken ni Presidente Ferdinand Marcos Jr. a protehiran na daytoy mainaig iti possible a pannakaiserbi ti arrest warrant manipod iti International Criminal Court (ICC).
Segun ken ni Palace Press Officer Undersecretary Claire Castro, amin nga agkidkiddaw ti proteksyon manipod iti gobyerno ket maipapaayan ti tulong kas maiyallubog iti linteg, karaman dagiti akusado kas ti senador.
Inbatad ni Castro nga uray dagiti biktima ti extrajudicial killings ket agkidkiddaw ti proteksyon manipod iti gobierno ken karbengan ti kada umili a maikkan ti umdas a proteksyon ken due process iti babaen ti linteg.
Inpasigurado pay ti Palasyo a no bilang maarestar ni Dela Rosa, maipaay kenkuana ti amin a karbengan kas maysa nga akusado.
Inlawlawag met ni Castro a saan a makibiang ni Presidente Marcos iti aniaman nga isyu nga adda iti hurisdiksyon ti senado gapu ta adda ti bileg ken otoridad ti Senado ti panagdesisyon kadagiti banag nga adda ti pakainaigan daytoy.
