LAOAG CITY – Saan pay laeng a kayat nga agkomento ti Malacañang mainaig iti posible a pannakaiparuk-at ti baro nga arrest warrant manipud iti International Criminal Court (ICC) kontra iti dadduma pay a maipagarup a karaman iti war on drugs ti napalabas nga administrasion.
Daytoy ket kalpasan nga inrakurak ti National Bureau of Investigation (NBI) a namnamaenda nga adda pay ti dadduma pay a warrants a mabalin nga iparuk-at ti International Criminal Court.
Inbatad ni Palace Press Officer Claire Castro a posible a maaddaan ti nayon a warrants gapu ta adda ti sabali pay a maitudtudo a co-perpetrators iti kaso.
Nupay kasta, kunana nga iti agdama ket awan pay ti naawatda nga impormasion ti gobierno maipanggep iti daytoy.
Inlawlawag ni Castro a saan nga agbaliw ti agdama a takder ti gobierno maipapan iti nasao a banag.
Kabayatanna, mainaig iti posibilidad nga ikabil iti protective custody ti Senado ti asinoman a senador a psoible a sumango iti warrant of arrest, inpetteng ni Castro a saan pay laeng a kayat ti Palasyo a mangipaay ti komento agingga nga awan ti naiparuk-at a warrant.
