LAOAG CITY – Iyal-alisto dagiti hues ti International Criminal Court ti panagdengngeg iti kaso ni dati a Presidente Rodrigo Duterte kagiddan ti pammilin ti baro a medical assessment tapno maammoan no mabalin pay daytoy a sumango iti panangusig.
Iti umuna nga status conference idi Mierkoles, kuna ni Presiding Judge Joanna Korner a kasapulan a mapadaras ti proceedings gapu iti kondision ti salun-at ken tawen ni Duterte.
Inbatadna a posible a makaapektar ti kasasaad ti salun-at ni Duterte iti schedule ti panangusig pakairamanan ti posibilidad a maipababa dagiti lawas ti panagdengngeg.
Tinalantan ti chamber ti nagduduma a banag maipanggep iti pre-trial pakairamanan ti posible a timetable ti panangusig, disclosure of evidence, witness protection, victim participation ken ti posible a panangnayon dagiti baro nga insidente iti kaso.
Insingasing ti prosekusion a rugian ti panangusig inton Nobiembre 30 idinto a kiniddaw ti depensa ti at-atiddog a panawen tapno matingiting dagiti ebidensia.
Nagballaag ni defense lawyer Peter Haynes a mabalin nga agbalin a narigat para iti gobierno ti kaso no itultuloy a palawaen ti sakupen daytoy iti babaen ti panangnayon dagiti insidente.
