LAOAG CITY – Naitaray iti ospital ni dati a Department of Public Works and Highways Secretary Manuel Bonoan gapu ta ngimmato ti blood pressure kalpasan a rimuar ti arrest warrant na manipod iti Sandiganbayan.
Kinumpirmaran daytoy ni Deparment of Interior and Local Government (DILG) Secretary Jonvic Remulla kalpasan ti boluntaryo nga isusuko ni Senador Jinggoy Estrada.
Daytoy ket gapu ta karaman ti dati a sekretaryo a sumangsango iti kaso a plunder gapu iti maanomalya a flood control projects.
Inbatad pay ni Remulla a naiget ti panangbantay dagiti otoridad iti PNP General Hosptial no sadinno a ti doktor ti agdesisyon no mabalinen a rumuar ni Bonoan tapno sangwen ti kaso na.
Maipalagip nga iti napalabas a lawas ket nagpiyansa da Bonoan ken Estrada iti Sandiganbayan gapu iti kaso a graft.
Nupay kasta, nangiparuk-at met ti Fifth Division Sandiganbayan ti sabali pay a warrant of arrest kontra kada Bonoan ken Estrada.
