LAOAG CITY – Inpakaammo ni Mayor James Bryan Alcid nga umabot iti 240 a solar lights iti manamnama a mainstolar kadagiti nagduduma a paset iti centro itoy siudad ti Laoag.
Kunana a maikkan ti prioridad dagiti urban area wenno centro ditoy siudad ket maitultuloy pay daytoy iti paset ti Bacarra road, Primo lazo, ken nagduduma pay para iti nalawlawag a pagdalyasatan dagiti behikulo ken umili.
Innayonna a malaksid kadagiti nadakamat a lugar ket maikkan pay iti solar light iti paset ti airport road ken by-pass bridge no sadinno a mannarimaan ti pannakikoordinarna iti Department of Public Works and Highways (DPWH) 1st District para kadaytoy.
Kabayatanna, kinunana a saan met nga adu iti pundo para kadaytoy ngem nupay kasta ket in-inotenda nga aramiden ti kabaelanda para iti nasao a banag.
