LAOAG CITY – Dinayaw ni Vice Mayor Rey Carlos Fariñas iti kaunaan a pannakaiyempmentar ti Youth Parliament Program ditoy ciudad ti Laoag.
Inbatad na a napintas daytoy nga aktibidad para kadagiti agtutubo tapno adda iti pangrugian da a makasursuro no kasano iti pannakasolbar a nasayaat dagiti nagduduma nga isyu.
Kunana a babaen iti daytoy ket maasa ti panunot da iti usto a proseso iti pannaki-debate ken saan laeng a kanayon nga out of the order iti ammo da a sawen.
Mainaig iti daytoy, kuna ni Vice mayor Fariñas a napinpintas no nasapa ti pannakamuli dagiti agtutubo babaen iti pannakaisuro kadakuada dagiti agkakapintas a kababalin.
Immuna iti daytoy, nagballigi ti naiyuswat a programa para kadagiti agtutubo ditoy cuidad babaen ti panangidaulo ni Michael Christophe Agustin, ti Sang Kabataang Federated President ditoy ciudad.
Naamoan a daytoy a programa ket nagsentro kadagiti wagas a panangisagana kadagiti agtutubo ken pannakadengngeg ti boses da mainaig ti local government ken nation building.
