LAOAG CITY – Naduktalan ni Konsehal Jason Perera a dakkel ti panagkurang ti bilang dagiti personnel ti Philippine National Police ditoy ciudad ti Laoag.
Segun ken ni Perera, nakasarita na ni Police Lt. Col. Ryan Retotar, ti chief of police ditoy ciudad ti Laoag kabayatn ti panagturong na iti police station.
Kuna na nga iti panagsarita da ken ni Retotar ket nadakamat na ti obserbasyon na nga awan dagiti kameng ti pulisya a nakadeploy iti Ablan Avenue ken paset ti Ilocos Norte National High School, no sadinno nga insungbat met ti chief of police nga agkurkurang ti personnel da.
Basar iti chief of police, adda ti 40% wenno kaibatugan ti sumurok-kumurang a 100 ti kurangda a personnel ditoy ciudad ti Laoag, banag a nakakigtotan ti konsehal gapu ta no adda ti emergency ket bassit laeng dagiti makapagresponde a kameng ti nailian a pulisya.
Maipalagip nga immunan a kinondenar ni Konsehal Perera ti maipagarop a nabayag a panagresponde dagiti kameng ti pulisya ditoy ciudad kalpasan a nairaman iti aksidente iti paset ti Panganiban Street Corner P. Lazaro .
Inlawlawag met ti mangidadaulo iti Philippine National Police a ni Police Master Sergeant Eric Bumagat a saan da a nakapagresponde a dagus gapo ta nairana nga adda ti immuna a rinespondean da nga aksidente ditoy ciduad ti Laoag.
Pinadas met ti news team ti Bombo Radyo Laoag nga alaen ti takder ni Police Lt. Col. Retotar mainaig iti daytoy nga isyu, ngem saan nga agsungsungbat ti tawag ti nasao nga opisyal.
