LAOAG CITY – Nagdidinnungpar ti uppat a behikulo iti paset ti Brgy.20 San Jose iti ili ti Sarrat.
Ti disgrasia ket pakairamanan ti maysa a Toyota Vios nga immanehar ti maysa nga agtawen ti 63, naasawaan, mannalon, ken residente ti Brgy. 60-B Madiladig iti siudad ti Laoag.
Maysa a tricycle a Honda TMX 155 nga immaneho ti maysa a lalaki nga agtawen ti 51, mannalon, ken residente iti Brgy. 22, San Cristobal iti ili ti Sarrat.
Ti maysa ket agtawen ti 53, mannalon, ken residente ti Brgy. Saludares iti ili ti Dingras a lubbon daytoy ti agtawen ti 55, mannalon, ken residente ti isu met laeng a lugar.
Kabayatan a ti maysa ket Toyota Hi-Ace GL Grandia nga immanehar ti maysa a lalaki nga agtawen ti 43, naasawaan ken residente iti Brgy. 20 San Jose iti ili ti Sarrat.
Basar ken ni Police Capt. Ashley Cacayorin, ti Chief of Police ti Philippine National Police (PNP) Sarrat, a ti tricycle, motorsiklo, ken van ket agturrong iti daya a direksion idi kellaat a nasapgud iti handlebar ti tricycle ti Toyota Vios nga agturong iti laud a direksion nga isu ti gapuna a nairaman dagiti dadduma pay a behikulo a sumarsaruno iti tricycle.
Gapu iti daytoy, nakaala ti sugat iti nagduduma a paset ti bagi ti driver ti tricycle no sadinno a saan a nasugatan wenno naan-ano dagiti pasaherosna.
Naamoan a ti driver ti kotse ket maipagarup a nakainom ket inpakaammo ni Police Capt. Cacayorin nga ur-urayenda ti resulta ti liquor test para iti pannakakumpirmar daytoy.
Innayon pay ti Hepe nga iti agdama, awan ti planoda nga agipila ti kaso ngem kalikagumda a mapabayadan dagiti naperdi a paset ti lugan dagitoy.
