LAOAG CITY – Ngimmato ti 11.4% year-on-year ti pautang manipud kadagiti universal ken commercial banks idi Abril maidasig iti 10.7% idi Marso basar iti Bangko Sentral ng Pilipinas (BSP).
Kalpasan nga i-adjust para iti seasonal fluctuations, dimmur-as ti 1.1% month-on-month ti outstanding loans a mangipakpakita ti namnamaen a demand iti pautang manipud kadagiti negosio ken pagtaengan iti maikadua a quarter ti 2026.
Dimmakkel ti 11.8% ti outstanding loans kadagiti residente idi Abril manipud iti 11.1% idi Marso a bukbuklen ti dakkel a paset ti pakabuklan a pautang.
Kabayatanna, bassit a porsiento laeng ti naikabil kadagiti saan a residente.
Para kadagiti aktibidad para iti negosio, ngimmato ti 10.7% ti lending, nangatngato ngem iti 9.7% idi Marso.
Dakkel ti panagngato iti sumagmamano a kangrunaan nga industria kas ti real estate activities (8.1%), electricity, gas, steam ken air-conditioning supply (25.8%), wholesale ken retail trade pakairamanan ti repair ti motor vehicles ken motorcycles (11.8%), manufacturing (1.0%) ken financial ken insurance activities (6.7%).
Iti consumer loans, ngimmato iti 19.6% ti pautang kadagiti residente, apagapaman a gimminad manipud iti 20.5% iti napalabas a bulan a mangipakpakita ti moderation iti credit card ken motor vehicle loans.
Banbantayan ti Bangko Sentral ng Pilipinas ti garaw ti bank lending gapu ta maysa kadagiti kangrunaan a pagtarayan ti monetary policy nga addaan ti direkta nga epekto iti ekonomia ken iti kabaelan dagiti negosio ken dagiti umili a makaala ti pundo.
