LAOAG CITY – Posible a maaddaan ti baro a panangidaulo iti impeachment trial ni Vice President Sara Duterte kalpasan nga inrakurak ti kampo ni Acting Senate President Sherwin Gatchalian nga ad-adalenda ti panagpili ti sabali a Senador kas presiding officer iti panangusig.
Daytoy ket kagiddan ti sayangguseng a ni Senador Francis ”Chiz” Escudero ti mabalin a mangidaulo iti impeachment proceedings iti impeachment court.
Inbatad ni Gatchalian a saan pay a pormal a napagsasaritaan ti majority group ti nasao a banag.
Mainaig iti daytoy, masansan a ti Senate President ti agserserbi kas presiding officer kadagiti impeachment trial.
Nupay kasta, inaprobaran ti paksyon ni Gatchalian dagiti pannakabalbaliw iti impeachment rules a nangipaay ti wagas kadagiti Senador a mapili ti mayorya ti posible a mangidaulo iti panangusig.
Naammoan a no agbalin nga epektibo dagiti baro a pagannurotan kalpasan ti kasapulan a publication, mabalinen nga ipatungpal ti nasao a panagbalbaliw iti proseso ti impeachment.
Iti babaen ti Konstitusion, ti Chief Justice laeng ti mangidaulo no Presidente ti dumaldalan iti panangusig iti impeachment.
Para met kadagiti dadduma nga opisial, karaman ti Bise Presidente, ti Senado ti addaan ti bileg a mangikeddeng ti agbalin a presiding officer basar kadagiti maipatpatungpal a pagannurotan.
