LAOAG CITY – Nagbalin nga emosional ni Gov. Cecilia Araneta Marcos kagiddan iti pannakaselebrar ti maika-128 a tawen ti Independence Day.
Segun kenkuana, ikarkararagna ti panagayat iti Dios, ti pagilian ken kadagiti umili iti baet ti mapaspasamak a riribok iti lubong ti pulitika iti agdama.
Inbatadna a mangnamnama daytoy a malpasen ti saan a panagkikinnaawatan ken panagginnura dagiti agpanpanday linteg iti pagilian tapno amin ket agkaykaysa.
Kabayatanna, sinaludaran ni Gov. Marcos dagiti amin a Pilipino a nagsakripisio ken nangilaban ti pagilian tapno naan-anay a magun-od ti panagwaywayas.
Dinayawna pay dagiti kontribusion nga inpaay dagiti bannuar nga Ilokano kas kada Juan ken Antonio Luna, Gen. Artemio Ricarte, Gregorio Aglipay, Roque Ablan Sr., Ferdinand Marcos Sr. ken Josefa Llanes Escoda.
Mainaig iti daytoy, inpannakkel ni Mayor James Bryan Alcid dagiti amin nga inaramid dagiti Pilipino a saan a simmuko tapno laeng saan a masakup ti pagilian uray biagda ti kasukatna.
Linagip met ni Ilocos Norte 2nd District Rep. Angelo Marcos Barba ti kinatured dagiti amin a nakilaban a Pilipino maipasigurado laeng a saan a maagaw ti asinoman ti pagnanaedan a pagilian a Pilipinas.
