LAOAG CITY – Naipaay kadagiti estudyante manipod Nueva Era ti maysa a building ti Mariano Marcos State University iti ciudad ti Batac.
Segun kenni Mayor Aldrin Garvida, dakkel a pakalag-anan dagiti nagannak daytoy a naipaay kadakwada babaen ti naiget a koordinasyon ti Local Gobierno iti ili ti Nueva Era.
Kunana nga imbes a 2,500-3,000 ti pagrenta dagiti estudyante manipod iti ili ti Nueva Era iti kada bulan ket 800 laeng ti baybayadan da.
Inlawlawag pay ni Garvida a dati ket mamintallo a gundaway nga aglugan dagiti estudyante manipod iti ili ti Nueva Era agingga iti Mariano Marcos State University iti ciudad ti Batac, ngem ita ket deretso dan gapu ta adda ti lugan ti lokal a gobierno a maus-usar tapnu agitulnog ke mangsukon kadagitoy.
Innayon na a dati ket inaldaw nga agawid dagiti estudyante da ngem tapno saan da a mabannog ket naipaayan laengen dagitoy ti dormitory building.
Inpasingked ti mayor nga agtultuloy daytoy nga ar-aramiden da gapu ta maka-ayayo dagiti estudyante aglalo ket kanayon a mangipapaay da ti paka-idayawan ti ili da.
