LAOAG CITY – As-asidegen kadagiti komunidad ti Eastern Laguna ti serbisio iti salun-at ken humanitarian kalpasan nga inrubuat ti Philippine Red Cross ti baro a Siniloan Branch ken Blood Collecting Unit/Blood Station.
Daytoy ti maikapat a branch ti Philippine Red Cross idiay Laguna nga agserbi iti walo nga ili ti Eastern Laguna ken kaparanget a lugar iti Rizal ken Quezon.
Ti pasilidad ket mangipaay ti al-alisto nga access iti blood collection, storage ken distribution tapno masigurado nga adda ti umdas ken natalged a suplay ti dara para kadagiti pasiente ken ospital.
Malaksid iti blood services, agserbi pay daytoy kas humanitarian hub a mangipaay kadagiti nagduduma a programa ti Red Cross kas ti emergency response, disaster preparedness, health and welfare programs ken volunteer development.
Inbatad ni Philippine Red Cross Chairman ken CEO Richard Gordon ti panaglukat ti branch ket paset ti gagem a palawaen ti network ti Red Cross tapno ad-adda a maiyasideg ti serbisio medikal kadagiti tattao.
