LAOAG CITY – Mamati ni Presidente Ferdinand Marcos Jr. a kabaelan nga idauloan ni Senador Francis ‘Chiz’ Escudero ti impeachment trial kontra ken ni Vice President Sara Duterte no isuna ti agbalin a Presiding Officer ti Senado kas impeachment court.
Daytoy ti rakurak ti Presidente idi nasaludsod mainaig kadagiti kritisismo kontra ken ni Escudero mainaig iti posible a panangiggem daytoy iti panangusig.
Inbatad ni Presidente Marcos nga opinyon laeng dagiti pammabalaw ken saan daytoy a nasken a pagibasaran iti kabaelan ni Escudero nga idauloan ti proseso.
Inpettengna a ni mismo a ni Escudero ti agar-aramid kadagiti pagannurotan nga us-usaren ti Senado iti napalabas nga impeachment proceedings.
Innayonna a saan a maitudo ni Escudero iti pannakaisardeng ti napalabas nga impeachment trial gapu ta resulta daytoy ti nagbalin a desision ti Korte Suprema ken saan ti aniaman a panagkurkurang ti Senador.
