LAOAG CITY – Manamnama a malukatan ti Animal Bite Treatment Center iti City Health Office ditoy siudad ti Laoag.
Segun ken ni Dr. Rodrigo Catcatan, maiyur-uray laengen ti pannakaikabil iti aircondition-na daytoy tapno naan-anayen a malukatan.
Inbatadna a ditoy ti pagturunganton dagiti umili a makagat wenno makaramutan kadagiti tarakenda nga aso wenno pusa.
Inlawlawagna a ti pannakaaramidna daytoy ket tapno adda ti pakaipapanan dagiti pasiente nga agpabakuna iti anti-rabies vaccine ken saanda a mailalaok kadagiti regular a pasiente.
Mainaig iti daytoy, kuna ni Dr. Catcatan nga adu latta dagiti agturturong iti opisinada tapno agpabakuna iti anti-rabies vaccine a dagitoy ket nakagat wenno nakaramutan kadagiti tarakenda nga aso ken pusa.
Innayonna nga iti agdama ket awan ti kaso ti human rabies ditoy siudad ti Laoag ken adda ti umdas a suplay ti City Health Office nga anti-rabies vaccine.
