LAOAG CITY – Inpannakkel ti Malacañang dagiti nagbalin a resulta ti diplomatic efforts ti Marcos Administration kagiddan iti panangipasigurado nga agtalinaed a prioridad ti gobierno ti kasasaad dagiti Pilipino sadinoman a paset ti pagilian.
Inbatad ni Palace Press Officer Undersecretary Claire Castro a pammaneknek nga epektibo ti pannakikammayet iti diplomatiko ti administrasion ti naballigi a panagtulong kadagiti Pilipino a sumangsango kadagiti nagduduma a parikot iti sabali a pagilian.
Karaman ditoy ti panagawid ti 24 a Pilipino a nabalud idiay Russia iti uneg ti siam a bulan gapu iti isyu iti immigration, panagsubli ditoy pagilian ni Mary Jane Veloso ken panangsolbar ti kaso ti 17 nga Overseas Filipino Workers (OFWs) nga inarestar iti Qatar kalpasan a nairaman iti maysa a saan nga otorisado a panaguummong idi Marso 2025.
Basar iti Malacañang, ipakpakita dagitoy a kaso ti agtultuloy a panangikagumaan ti gobierno a protektaran ken tulungan dagiti Pilipino sadinno man ti ayanda.
