LAOAG CITY – Maproblemaan ti sumagmamano a mannalon ditoy probinsia iti panagpadanum kadagiti mulada iti baet a naideklararen ti panawen ti panagtutudo ditoy pagilian.
Segun ken ni Mr. Jhon Rey Salud, Presidente ti North Main Canal Irrigators’ Association, naisayangkat ti taripnong dagiti nagduduma a gunglo dagiti mannalon pakairamanan iti ili ti Vintar, Bacarra ken Pasuquin no sadinno a napagnunumoanda a mangrugi ti panagpadanum kadagiti sumagmamano a paset ti kataltalonan iti ili ti Vintar inton Hulio 1.
Inbatadna a sumaruno a mabenepisiaran dagiti mannalon iti ili ti Bacarra ken Pasuquin.
Inlawlawagna a gapu ta makapaspasarda ti panagtikag kadagiti kataltalonan ket high value crops ti kangrunaan pay laeng nga imulmulada tapno saan unay a kasapulan ti kanayon a panagsibog kadagiti mula.
Innayonna a gapu iti kinakurang ti danum ket isaysayangkatda ti direct seeding tapno saanda unay a marigatan ti panagmulada kadagiti produkto agrikultura.
